قصيدة عمرك
بقلم الشاعر أبو يوسف محمد
لما نكون عايشين
أحلام سنين ضايعين
لما نكون حاسين
بغربة وكمان تايهين
لما يكون الوجع فرحك
لما يكون الكلام دمعك
إيه يكون عمرك ؟
لما الحروف
فى بداية السطور
بتموت
لما الغناوى
فى عيون الصغار
مرة ومن غير صوت
لما الخطاوى تكون واخدانا
والدمعة تكون سابقانا
والفرحة تكون بشروط
لما يكون السكوت مر
ويكون الكلام موووت
لما تكون
نقط الحروف هم
لما يكون
ضحك العيون وهم
لازم يكون
وجع السنين فرحك
و إيه يكون عمرك ؟
لما يكون عمرك
شك وظنون
لما تكون
نقط الدموع
جوة العيون
تنزل وتبكى
برة الجفون
كله يهون
لما يكون صاحب
عمره ما كان صاحب
ياخد الفرح منك
ويسيب الألم صاحب
ولما تصاحب
تصاحب كمان وجعك
إيه يكون عمرك ؟
لما تقول أيوة بألف لا
لما تكون الضحكة
تبكى بألف أه
وليه الفرح موجود
بس الوجع جواه
ليه الفرح موجود
بس الطريق تاه
لما تكون الغيوم شمسك
لما يكون السواد قمرك
إيه يكون عمرك ؟
لما يكون عمرك
نفسك تداوى الجرح
نفسك تشوف الفرح
لما يكون جواك
أحلام سنين عايشاك
لما كمان تنساك
عيون حبيب عاشقاك
إوعى فى يوم تحسب
إن الزمان و ياك
ولا عمره كان ضهرك
انسى فى يوم حلمك
انسى كمان نفسك
وانسى كمان .. عمرك
ليست هناك تعليقات:
إرسال تعليق